نيّالـــــــه

لفّ ثوبه حول خصره جيداً وأدخل نهايته بإحكام تحت خاصرته اليسرى ثم قام ''بكفّ'' ردني الثوب عن ساعديه بينما علامات الابتهاج والحماس تبدو واضحة على وجهه . وقف في منتصف الساحة ثم أعطى توجيهاته لأولاد الحي المتواجدين في المكان لكي يقوموا ''بتعزيل'' الساحة المقابلة من الحجارة والدّبش والأكياس البلاستيكية وقطع الحديد وأغصان الأشجار اليابسة و''الكنادر'' البالية..ثم دخل الى بيته مسرعاً، وخرج منها بعد أقل من دقيقة وهو يجرّ ''بربيشاً'' طويلاً..والماء يتدفق منه بشكل متقطّع..نتيجة التواءات مؤقتة مرّ بها البربيش اثناء السحب..ثم بدأ بترطيب الساحة ورشّ سياج الدار والبوابة والرصيف القريب.

في هذه الأثناء كان يجلس على حافة ''البلكونة'' ابنه ''عايش'' محاولاً ربط أحد طرفي حبل ''اللمبات'' في أعلى عمود الكهرباء وهو يعضّ على ''الكماشة'' بفمه، بينما يقوم ''شايش'' بسحب الطرف الثاني للحبل وربطه في ''خشبة طوبار'' تنتصب فوق دار (ابن تركية)..في حين يرفع ''شلاش'' الحبل المتدلّي من المنتصف خوفاً من تكسير ''اللمبات'' ممتثلاً ''لبهادل'' شقيقيه ومقتنعاً بوصفه ''بقلّة الفهم''..

عند دكّانة ''كرمة العلي'' توقّف بكم ''ديانا'' محمل بكراسي بيضاء ومكبّرات صوت ، سأل السائق ابن الحجة كرمة عن بيت ''أبي يحيى'' فوصفه له بأنه: (ثاني دخله على الشمال)..

اصطف البكم في منتصف الساحة فهرع الأولاد لتنزيل الكراسي..وتوزيعها على محيط المكان ،محاولين بذات الوقت العبث بمكبرات الصوت والميكروفونات وبأشرطة ''متعب السقار''..

قبل ان يغادر صاحب تأجير الكراسي اقترب من أبي يحيى مجاملاً:- - لعاد وين العريس خليني أبارك له؟! * أبو يحيى:- فيش عريس ؟ * صاحب الكراسي:- نعم؟ مش هاظ عرس؟ * أبو يحيى :- لا، هاي حفلة زغيرة ودبكة وعشا وأغان و''معاقطة''. بس مش عرس!! * صاحب الكراسي:- عدم المؤاخذة مشان شو هاي الحفلة؟ * أبو يحيى :- ابني يحيى الله فتحها عليه و(انحكم 10 سنين سجن) عقبال عندك.

* صاحب الكراسي بامتعاض : يكفينا شرّك!! ومبسوط وبتحتفل يا ختيار ، انه ابنك محكوم بالسجن * أبو يحيى: من قلّة ما يصحّلك!! واحد : ماكل، شارب، نايم، ماضي كهرباء ،على حساب الحكومة...وين صارت هاي..اي جدّ جدّه ما كان يحلم فيها..الحمد لله يا رب ..اللي ''طمّنتني'' على يحيى..

.....

ألم تجد نفس للحرية في هذه المقالة أخي دردور خاصّة وأنك مغترب؟
بس دخلك مششتتمنى السجن وتكي أبو زعبي حكالك!!!
ههه

......

بتعرف المثل اللي بيحكي " مليون جبان ولا الله يرحمه"؟ منيح صح؟ ههههه
انا ارفض بثّ التشاؤم في نفوس البشر وهذا لمجرد الإيقان بوجود الخالق. ولكن أليس من الأفضل ان يفقد المرء حريته على أن يفقد حياته كلها؟! أنا لا أعني شيء فالحالة مستورة والحمدلله ولكن صدقني الحال بين الناس صعب أخي فليش ما يروح السجن وياكل ويشرب ويعبد ربه هناك؟ يعني دخلك حرية من القلّة هالحرية اللي نحنا عايشينها. حاجتنا للمأكل إن حللتها بجد, تجدها قيد لحرية المرء؟ فلسفه بعرف بس كيف ما بتيجيها بتيجيك. الحرية لا تساوي شيء عندما يكون الخيار الاخر هو الحياة ذليلا وعبدا للدينار والقرش

اسفه على اللون الاسود في الرد ولكن هذا ما اعتقد ان الاخرين يحسون به... اما انا فوحياتك لو بنام بدون اكل طول عمري ما انا مستعدة اكشر ثانية لانه في رب وما بينسى حد, صح؟
واسفه هيك اسم المقاله " نياله" ههههه

ههههههههههههههههههه اه والله هاااااااااااااااااااااااي هي القصة وما فيها السجن للرجال زي ما بقولوا وهاي الطريقة الوحيدة الي بقدر يستفيد المواطن من الحكومة والضريبة مش مصاري اقامة جبرية والله يبعد عنا شر اللايذات

اخ Gr8mAn شكلك داخل عالموضوع وحاب انه الليلة نروح نبات بقفقفا بعيد عني!!!
اسمع انا كف واحد بحكي كل اشي مش قصد الصدمات ولا شو رايك؟
اهلا فيك بالمنتدى وشكرا على مرورك وبدنا فعالية يالله

اخت رمثاوية لو على قفقفا بسيطة بس انا بروح على سجن ناعور هناك الخدمات احسن

والله يبعدنا عن هالسيرة وابشري اني ومنتدى الرمثا عيوني الكوا ولمندى النشاما الرمثانة

الموضوع قمة في التميز و عن جد أبو يحيى إنه صادق
خلينا نحس بمصاري الحكومة!!!